Ditën e djeshme, kryeministri Edi Rama ka mbërritur në Presidencë, ku ka zhvilluar një takim me presidentin Ilir Meta, me fokus negociatat me Greqinë.
Mësohet se takimi mes tyre është zhvilluar pak orë pasi në zyrën e kreut të shtetit kishte mbërritur letra nga Ministria e Jashtme, me sqarimet për kërkesat dhe rezervat e shprehura nga Presidenti i Republikës.
Burimet bëjnë me dije se takimi mes Ramës e Metës u kërkuar në 2 mars nga kryetarja e Komisionit të Jashtëm, Mimi Kodheli dhe deputetja e PS, Vasilika Hysi, në takimin që u zhvillua në Presidencë, raporton Panorama.
Kryeministri dhe presidenti kanë diskutuar për rreth 1 orë lidhur me përplasjet e krijuara për grupin negociator dhe mbi sqarimet që Meta ka kërkuar para se të japë autorizimin për të negociuar me shtetin grek.
Informacione të detajuara që Meta kishte kërkuar, janë dhënë edhe në letrën që ministri Bushati dërgoi këtë të mërkurë në Presidencë.
Përpara se të takohej me kreun e Qeverisë, Meta deklaroi për mediat se për dhënien e autorizimit të grupit negociator të përcaktuar nga ministri Bushati, do të vendosë në momentin e duhur.
Nga ana e tij, kryeministri Rama ka dhënë sqarime në takimin e zhvilluar për takimet që ka pasur me përfaqësues të lartë të qeverisë greke për çështjet e ngelura pezull mes dy vendeve.
