Ish-ministri i Brendshëm, Saimir Tahiri është përplasur me deputetin e Partisë Demokratike, Enkeled Alibeaj, duke thënë se ai nuk pranon pranga politike. Ndërsa ka theksuar se nuk mban përgjegjësi për veprimet e kushërinjve të tij, duke i adresuar një pyetje sugjestionuese Alibeajt se një familjar e tij që ka kryer një krim do të duhet të mbajë përgjegjësi ligjore vetë deputeti i PD-së. Vetë Tahiri u shpreh i gatshëm të hetohet, por sipas tij, duhen prova dhe nuk mund të arrestohet me akuza politike.
Tahiri: Në fakt nuk kam asnjë lloj tundimi për tu vënë në provë nëse unë dua të hetohem apo jo. Ua them qartazi dhe prerë se unë do të jem këtu dhe nuk do të lëviz asnjë sekondë derisa të dalë e vërteta. Të hetohet dhe të dalë e vërteta. Unë nuk i përkas politike që kur prokurori hetonte e cilësonte lavire. Unë i përkas atij edukimi që respekton prokurorin duke mos bërë politikë me këtë. Unë do të luftoj që e vërteta të dalë në dritë. Unë do të kërkoj çdo provë që e vërteta të dalë në provë. Unë do të refuzoj çdo politizim të kësaj çështjeje si të llumit të rrugës si dhe të kujtdo tjetër. Përpjekja ime për të bërë drejtësi nuk është as gjunjëzim as për t’iu përkulur ndokujt.
Ndërkaq, deputeti i PD-së Alibeaj e ka vënë përpara provës së deklaratës së bërë pak ditë më parë nga vetë Tahiri, i cili kërkoi që të hetohet duke i hequr imunitetin dhe mandatin e deputetit. Ndërsa avokati mbrojtës.
Tahiri: Unë jam i gatshëm të hetohem dhe të bëj gjithçka që e vërteta të dalë në dritë. Jam i gatshëm të mbaj përgjegjësi për çdo veprim timin. Por unë kërkoj prova. Ju nuk mund të kërkoni prova që dy banditë thonë për mua se unë fitoj 5 milionë euro apo se në përgjime del një Saimir që ngarkon thasët e hashashit, kur nuk kam as pasaportë kamioni. Një familjar i yti ka vrarë një njeri do të pranoje ti të shkoje në burg. Po të jetë për deklarata politike kisha shkuar në burg që kur bëheshin deklarata politike nga Sali Berisha. Kam dëgjuar akuza që jam vrasës apo mafioz. Me standardin tuaj shkoja në burg dhe nuk jam nga ata që i thoshin prokurores lavire
Alibeaj: Do të duhet të zgjedhim standardin e duhur. Po mirë, përderisa sa s’ka prova, pse nuk shkoni para gjykatës që të pastroni shpirtin para gjykatës. Ky është standardi moral. Pse nuk e kërkon sot. Je për një standard moral apo jo?!
Saimir Tahiri: Jam gati të hetohem dhe të përgjohem. Jam gati të vini në shtëpinë time, të shikoni makinën time. Jam gati të bëj gjithçka, por pranga politike në duar nuk pranoj. Harroje! Apo të krahasohem me ty, që të rri me partitë me hajdutë dhe kriminelë si në partinë tënde. Jam gati për gjyqin politik dhe për gjyqin ligjor.
Gramoz Ruçi: Nuk është gati për të bërë gjyqin politik as gjyqin juridik.
