Ish-ministri i Brendshëm, Saimir Tahiri ka kërkuar që seanca e sotme të mos zhvillohet me dyer të mbyllura, pasi tashmë nuk cenohet asnjë sekret hetimor.
“Pas një vit e gjysmë nuk ka më sekrete, prokuroria ka nxjerrë lajme për dosjen time me SMS në media, por nuk di ça sekreti ka më kjo dosje. Seanca të jetë me dyer të hapura dhe me kamera, por le ta vendosë gjykata”, është shprehur Tahiri.
Tahiri mbërriti paraditen e sotme në Gjykatën e Krimeve të Rënda së bashku me avokatin e tij Maks Haxhia. Ai ka ankimuar zgjatjen e afatit të hetimeve ndaj tij nga ana e Prokurorisë së Krimeve të Rënda, duke kërkuar që çështja të shkojë në Gjykatë.
Më herët, ishte Prokuroria e Krimeve të Rënda që njoftoi zgjatjen e hetimeve me tre muaj të tjerë për ish-ministrin, shkak për të cilin duket se është bërë letër-porosia që autoritetet shqiptare i kanë dërguar Malit të Zi dhe Katanias. Përgjigjja ende nuk ka ardhur dhe dosja nuk mund të dërgohet për gjykim nëse nuk ka përfunduar procesi i hetimit.
