Ish-ministri i Brendshëm Saimir Tahiri duke iu përgjigjur pyetjeve të deputetëve të Partisë Demokratike në mbledhjen e Këshillit të Mandateve, theksoi se denoncuesi i tij, Dritan Zagani është blerë nga ish-kryeministri Berisha duke i dhuruar Zaganit tokë në Orikum. Tahiri replikoi vazhdimisht me deputetët e PD-së duke e cilësuar të gjithë seancën si një gjykim me standardin e Berishës.
Tahiri: Jam shumë i hapur që të hetohet gjithçka lidhur me mua. Por nuk mund të pranoj që me standardin e Berishës të arrestohem dhe pastaj të gjej provat. Provat duhen tani. Jam i gatshëm dhe i hapur për disponueshmërinë e prokurorisë. Nuk kam ndërmend të lëviz asnjë cenimetër. Nuk kam kapacitet të prish provat në Itali. Sa i takon makinës time, sa i takon qëndrimit të mbajtur ndaj Dritan Zaganit, apo në akuzat e ngritura prej tij në publik, unë as jam fshehur dhe as kam shpërdoruar detyrën time. Edhe atëherë kam kërkuar që të hetohet çdo gjë për deklaratën të tij. Sot keni një deklaratë të prokurorisë së krimeve të rënda të Fierit. Të gjitha ato që thoni ju dhe ai janë gënjeshtra. Ju keni qenë ministër. Shefi juaj ka qenë ministër. Në kohën tuaj i keni dhuruar tokë në Orikum duke e blerë. Për cilën arsye i dhatë tokë Dritan Zaganit, për ta blerë? Unë jam mësuar me çdo lloj denoncuesi të racës suaj. Sa takon a jam fajtor apo jo? Unë jam në pritje që këtë përgjigje ta japin institucionet. Unë kam vetëm një premtim, që bëni durim kur të vijë dita që do të dalë e vërteta. Ajo ditë do të jetë dita kur do të dalë e vërteta e llumit ku zhyteni ju dhe çdo lloj race e politikanëve tuaj.
