Në këto ditë të nxehta të muajit korrik shumë njerëz kërkojë që t’i shpëtojnë vapës së nxehtë dhe të bëjnë diçka ndryshe. Të gjithë ata që janë në Tiranë dhe duan të kalojnë një ditë super të bukur, për ata që pëlqejnë të njihen me historinë dhe me legjendat, me mrekullitë e natyrës që na janë falur dhe akoma nuk i ka shkatërruar njeriu, për ata që pëlqejnë të ngjiten, të ecin, të lahen dhe të jenë sa më pranë të bukurës estetike që gjendet në natyre, ne ju sugjerojmë “Syrin e Cikllopit”.
Po ju themi që të vizitoni pikërisht atë vend që i thonë ndryshe “Gjurma e Ciklopit” i cili ndodhet rreth 4 km nga qendra Krrabës, në fshatin e quajtur Skuterë, në luginën e lumit Erzen. Ai është rreth 20 m i gjerë dhe 120 m i thellë si një perlë e fshehur në grykën e Krrabës.
Një humnerë e vogël rri në fund të shkëmbinjve të Krrabës, dhe poshtë saj është një liqen me ujë të smeraldtë, për të cilin thonë se është vendi ku bisha dha shpirt e pas tij mbeti një liqen në formë zemre. Shkurtimisht kjo legjendë flet për një bishë të stërmadhe (pothuaj të gjitha legjendat shqiptare kanë një gjigand apo një ciklop), e cila e përndjekur nga banorët e zonës, pas shumë dëmeve që kishte shkaktuar, përfundoi pikërisht poshtë këtyre shkëmbinjve. Thonë se aty ku shkeli për herë të fundit bisha, mbetën gjurmët e gërvishtjes së kthetrave të tij dhe aty ku vdiq, mbeti një liqen në formë zemre.
Si të gjitha legjendat që trupin dhe kokën i kanë në imagjinatë por këmbët i kanë të ngulura fort tek e vërteta, edhe në këtë rast, shihen disa gërvishtje të thella në shkëmb dhe liqenin e mrekullueshëm në formë zemre.
