Restaurimet në Kishën e Labovës në Gjirokastër kanë nxjerrë në dritë një afresk të ri mural të mbuluar nga suvatimi prej dhjetëra vitesh. Figali Memo që shërben në këtë kishë thotë për Zërin e Amerikës se zona e murit ishte e fryrë nga uji dhe binte pak nga pak. Kisha e Shën Marias së Labovës është një monument kulture me vlera të rralla historike dhe ndërtimore dhe nga më të vjetrat në botë. Ajo u dëmtua gjatë regjimit komunist kur u kthye në një magazinë prodhimesh bujqësore. Kryqi i shenjtë u zhduk para përmbysjes së regjimit komunist. Udhërrëfyesi Stefan Miha thotë se restaurimi i fundit e ka shpëtuar nga degradimi Kishën e Labovës që njihet si një monument i rrallë por mes studiuesve shqiptarë ka pasur debate për disa nga vlerat e vjetra që janë cenuar me restaurimin e ri.
