Sa lidhje mund të ketë një shqiptar në ndeshjen Carpi – Cosenza? Thuajse zero, ndoshta ndonjë skaut që mund të shohë ndonjë futbollist për ta katapultuar, por në aspektin tifozerik, është zero. Përceptimi i parë i tillë është, por nuk duhet të jemi kaq të prerë dhe të mendojmë kaq cekët, pasi realisht kemi disa lidhje të vjetra dhe të forta: arbëreshët!
Qyteti i Cosenza-s është një zonë që ka shumë arbëreshë dhe këta të fundit nuk mund të qëndrojnë pa e shpalosur krenarinë e të qenit shqiptarë dhe në stadium. Në takimin e sotëm ndërmjet Carpit dhe Cosenza-s të vlefshme për Serinë B nuk mungoi dhe tifo-grupi shqiptar i “ujqërve”. Telesport arriti të sigurojë një foto të banderolës së tyre të shpalosur me krenari në tribunën e stadiumit. Me simbolin e ujkut dhe ngjyrat kuqeblu shkruhet: “Ujqërit Modena”. Një detaj interesant që na kujton dhe herë të tjera se sa të lidhur janë arbëreshët me trojet e tyre.
