“Tifozët Kuq e Zi” nuk do ta ndërpresin bojkotin për të ndjekur kombëtaren në një stadium në Shqipëri, si reagim kundër trajtimit të policisë ndaj tyre. Edhe në sfidën përballë Norvegjisë në “Elbasan Arena” ata kanë vendosur që të mos jenë prezent dhe këtë e kanë lajmëruar vetë ata me anë të një postimi në Facebook:
“Pas përpjekjeve të vazhdueshme për të realizuar një takim me ministrin e brendshëm, ky takim akoma nuk është realizuar. Vlen të përmendet gatishmëria e FSHF-së për të ndihmuar dhe ndërmjetësuar në gjithë këtë proces. Si rrjedhojë e këtyre rrethanave të pandryshuara, TKZ vazhdon bojkotin edhe në ndeshjen e sotme, për ndeshjet brenda, duke shpresuar në gjetjen sa më të shpejtë të një gjuhe të përbashkët me autoritetet policore. Sidoqoftë, i urojmë suksese kombëtares sonë në miqësoren ndaj Norvegjisë”.
Ndërkohë, një nga anëtarët e këtij tifo-grupi shumë të njohur edhe tejet të organizuar, ka zbuluar dicka përmes mesazhit të tij në Facebook: “Përshëndetje çuna. Grupi ynë, siç e dini, vazhdon të jetë në bojkot. Sot kryesia jonë ka vendos që të futemi në stadium 30 minuta pasi njëri prej anëtarëve të kryesisë do t’i bëjë propozim për martesë nuses së tij. Biletat do t’i blejmë rrugës për në stadium. Kush dëshiron të vijë në orën 5, takohemi te lloto. Mbasi të dalim nga stadiumi, të gjithë bashkë do ta shikojmë ndeshjen në lokal”.
