Kampionati italian duket se është në rrugën e duhur për tu rikthyer në nivelet që ishte disa vite më parë, ku aty luanin lojtarët më të mirë në qarkullim. Por këtë vit me ardhjen e Ronaldos tek Juventusi edhe ekipet e tjera kanë bërë investime të rëndësishme dhe pritet që ‘lufta’ për tu shpallur kampion të jetë më e egër.
“Club Soccer Predictions”, me anë të një kompjuteri ka bërë disa përllogaritje për të mos pritur majin, por që të mësohet që tani kampioni i Serie A. E para në bazë të llogaritjeve që janë bërë për tu shpallur kampion qëndron Juventusi, me një përqindje të lartë, 46% të mundësive. Ndërsa pas bardhezinjve renditet Napoli dhe Roma që kanë respektivisht 17% dhe 11% të shanseve për të fituar kampionatin.
Dy klubet e Milanos pavarësisht investimeve nga kompjuteri supozohet të përfundojnë në vendin e katër dhe të pestë. Interi renditet i katërti pasi ka 47% të shanseve për të marrë pjesë në Champions League dhe vetëm 7% për të triumfuar në kampionat. Ndërsa Milani ka 31% të shanseve për t’u kualifikuar në Champions League dhe vetëm 4% për ta fituar kampionatin.
Ndërkohë, Bologna, Parma dhe Frosinone pritet të jenë skuadrat që do t’i thonë mirupafshim kategorisë kryesore të futbollit italian në fundin e këtij sezoni.
Parashikime të tilla shihen shpesh gjatë sezonit, por “Club Soccer Predictions” ka gjetur pjesën më të madhe të pozicioneve të ekipeve të Serisë A sezonin e kaluar. Më poshtë janë dy tabela, në të djathtë është parashikimi i “Club Soccer”, në të majtë renditja përfundimtare e Serisë A.
