Meksika ka fituar edhe përballë Kores së Jugut, duke prerë kështu biletën për në raundin e ardhshëm të Botërorit. 2-1 ka përfunduar sfida e cila ka qenë mjaft e luftuar nga të dyja anët, por koreanët e gjejnë golin shumë vonë. Pasi fitoi 1-0 në ndeshjen e parë ndaj Gjermanisë, meksikanët konfirmohen si një nga zbulimet e “Rusi 2018”, ndërsa Koreja e Jugut është matematikisht e eliminuar pasi ka pësuar dy humbje.
Meksika kaloi në avantazh që në mesin e pjesës së parë me anë të një 11-metërshi. Ishte Carlos Vela që merr përsipër ekzekutimin e kësaj penalltie dhe nuk gabon. Ishte një prekje me dorë në zonë e lojtarëve koreanë dhe arbitri nuk kishte asnjë dyshim për këtë penallti.
Në minutën e 66-të, futbollisti simbol i meksikanëve, Javier Hernandez mbylli llogaritë me golin e dytë pas pasimit të marrë nga Lozano. Me katër gola, ai është bërë golashënuesi më i mirë i Meksikës në historinë e Botërorëve.
Në minutën e 93-të, Koreja e Jugut realizoi golin e nderit, të parin në këtë botëror, me anë të futbollistit më të mirë, Heung-Min Son, sulmuesi i Tottenham.
Në ndeshjet e fundit të Grupit F, Meksikës i mjafton të mos humbasë ndaj Suedisë, për të pasur garancinë e vendit të parë, duke shmangur vendin e parë të Grupit E (Brazili).
