Portali britanik “The Sun”, i ka kushtuar një artikull këngëtarit shqiptar Eugent Bushpepa, si një nga pretendentët për të fituar Eurovizionin.
“Në edicionin e këtij viti të festivalit evropian, Shqipëria do të shpresojë të sigurojë fitoren me këngëtarin Eugent Bushpepa, por a do t’ia dalë?”
Kështu e ka nisur shkrimin tabloidi “The Sun”, ku shkruan rreth kërngëtarit që do të përfaqësojë Shqipërinë në kompeticionin ndërkombëtar me këngën “Mall”.
“Eugent Bushpepa, i njohur me shkurtimin Gent, lindi në Rrëshen të Shqipërisë, në 2 korrik të vitit 1984, shkruan tabloidi. Ai nisi të këndonte në moshë të re dhe në mënyrë që të përmbushte ëndrrën e tij, në 2006-ën iu bashkua një programi “Talk show”, në Top Channel, si këngëtar. Që atëherë, Eugenti ka qenë pjesë e skenës muzikore, duke u bërë një prej këngëtarëve më popullorë në vend’’, shkruan “The Sun”.
E përditshmja britanike shkruan se Bushpepa u shpall fitues i edicionit të 56 të këngës në Shqipëri, nga një juri profesionale duke mundur një sërë këngëtarësh të tjerë të suksesshëm.
Në festivalin evropian të këngës do të paraqitet me këngën “Mall”, e shkruar posaçërisht për Eurovizion. Shqipëria ka marrë pjesë 14 herë në Eurovision, që prej debutimit në vitin 2004, duke përmendur Rona Nishliun si përfaqësuesen shqiptare të renditur më mirë në klasifikim. Le të shpresojmë se këto shkrime do të mund që të jenë një ogur i mirë për këngëtarin shqiptar. TIRANA TODAY
