Policia ka indetifikuar dhe shpallur në kërkim autorët e dyshuar pas sulmit me armë të ndodhur dje në fshatin Dobraç të Shkodrës, në drejtim të lokalit të efektivit të Shqiponjave Albert Pjetri. Sipas policinë, në kërkim janë shpallur R. P., O. P., B. P. dhe M. Sh, ndërkohë që vijon puna dhe kërkimet për kapjen e tyre.
Grupi hetimor, nën drejtimin e Prokurorisë së Rrethit Gjyqësor Shkodër, po punon për zbardhjen e plotë të rrethanave të ngjarjes.
“Identifikohen dhe shpallen në kërkim autorët e dyshuar të ngjarjes së ndodhur mbrëmjen e djeshme, në fshatin Dobraç, ku disa shtetas kanë qëlluar me armë zjarri në drejtim të lokalit të shtetasit A. P. Nga strukturat e DVP Shkodër, në bashkëpunim me Komisariatin e Policisë Shkodër, falë veprimeve të shpejta hetimore u identifikuan dhe u shpallën në kërkim shtetasit: R. P., O. P., B. P. dhe M. Sh.
Shpallja në kërkim e këtyre shtetasve u bë pasi mbrëmjen e djeshme dyshohet se kanë qëlluar me armë zjarri në drejtim të lokalit të shtetasit A. P., banues në fshatin Dobraç, Shkodër. Vijon puna intensive për kapjen e personave të shpallur në kërkim. Grupi hetimor, nën drejtimin e Prokurorisë së Rrethit Gjyqësor Shkodër, po punon për zbardhjen e plotë të rrethanave të ngjarjes”, njofton policia.
Këta shtetas kanë qëlluar në drejtim të lokalit të tre vëllezërve Pjetri, një prej të cilëve Alfred Pjetri, është pjesë e Shqiponjave. Vëllai i Alfredit, Vlash Pjetri, në një prononcim për mediat është shprehur se nuk kanë probleme me askënd, dhe se kanë punuar me djersën e ballit.
“Si familje kemi qenë të gjithë në shtëpitë tona. Lokali ka pasur një orë që ka qenë i mbyllur. Kemi dëgjuar krismat dhe kemi dalë për të parë lokalin. Policia ka ardhur në vendngjarje. Kur e kanë thirrur vëllanë me ardhur me dhënë deklarim kemi parë makinën, ka qenë e parkuar në oborr. Kanë hapur portën dhe kanë qëlluar edhe makinën.
Dyshimet nuk e di, s’i kemi bërë gjë dikujt. Kemi punuar me djersën e ballit, pavarësisht punës që bëjnë vëllerëzit. Nuk mund të ngremë dyshime sepse i përkasin policisë. Për punën e vëllait nuk mund të shprehem se punët e policisë i dinë ata vetë. Nuk kemi pasur asnjë konflikt me askënd. As unë për shkak të detyrës që kam qenë administrator.
Kështu që ia lëmë në dorë organeve hetimore. Lokali nuk ka pasur kamera sigurie, se ne jemi familje rreth e rrotull dhe e kemi ruajtur vetë. Se kur je i qetë dhe je në punën tënde, nuk ke pse ruhesh. Goditja ka qenë për shkak të detyrës të vëllait që është me Shqiponjat. S’i kemi lënë vend kujt. Nuk e di që ka pasur probleme. Mund të ketë ndal ndonjë makinë për punë letrash apo ashtu”, është shprehur Vlash Pjetri.
