Presidenti Volodymyr Zelensky ka thënë se 10 milionë ukrainas janë pa energji, pas një vale të re të sulmeve me raketa nga Rusia.
Të paktën shtatë persona u vranë në sulme, ndërsa numri pritet të rritet. “Ne po bëjmë gjithçka për të normalizuar furnizimin”, tha Zelensky në fjalimin e tij të natës.
Mbrojtja ajrore e Ukrainës arriti të rrëzojë gjashtë raketa lundrimi dhe pesë dronë, shtoi ai.
Të enjten, Rusia goditi Ukrainën me një breshëri të re raketash, duke goditur më shumë instalime energjetike dhe ndërtesa civile më pak se dy ditë pas një prej bombardimeve të saj më të rënda deri më tani.
Kjo ka qenë një taktikë ruse e kohëve të fundit, pas pengesave në fushën e betejës dhe ndikimi i saj ka filluar të ndihet më i mprehtë.
Njerëzit në Kiev u zgjuan nga një “batanije” dëbore të enjten në mëngjes, dhe mbylljet emergjente të energjisë kanë bërë që shumë nuk kanë ngrohje në shtëpitë e tyre. Ato që vuajnë nga ndërprerjet e energjisë janë kryesisht në kryeqytet, Kiev, në qytetin perëndimor të Vinnytsia, në qytetin port të Odesa-s në jug-perëndim dhe në Sumy në veri-lindje.
Ukrainasit po i marrin seriozisht alarmet e sulmeve ajrore. Kryeqyteti, Kievi, ishte vetëm një vend ku u dëgjuan sirenat të enjten. Rreth orës 08:00 me orën lokale (06:00 GMT), telefonat celularë filluan të zhurmojnë me paralajmërime zyrtare për një sulm të ri raketor në të gjithë Ukrainën.
Mbrojtja ajrore lokale u fut në veprim, dhe autoritetet ushtarake raportuan se katër raketa lundrimi dhe pesë dronë të prodhuar nga Irani ishin rrëzuar.
Burimi i lajmit: BBC. Përshtatur nga Tirana Today
