Eksperti i IT Gent Progni ka deklaruar në emisionin “Log” se pasojat e sulmit kibernetik mund të kishin qenë shumë më të mëdha, nëse sistemi nuk do të ishte fikur. Ai është shprehur se fikja ka sjell gjënë më të mirë dhe në një skenar tjetër, mund të ndodhte që të dhënat mos të ktheheshin më.
“Mbrojtja 100% bëhet nëse heq fishat, dhe heq sistemin nga aksesimi i jashtëm. Nuk është sulm i suksesshëm. Është më mirë, e di frustrimin, por fikja ka sjellë gjënë më të mirë që ky sulm nuk ka qenë efektiv. Ransomware është një virus që kopjon dhe fshin të dhënat.
Nëse do kishte qenë efikas të gjitha databazat e enkriptuara nuk do të ktheheshin më. Do të thotë investim nga e para. Ka ndodhur disa herë. Edhe në një televizion, dhe janë paguar para që të kthehen të dhënat.
Por varet kush po e bën sulmin. Nëse e bën një grup hakerash për përfitim monetar, ndodh që kthehet, nëse bëhen nga shtet armike ndryshon puna”, tha eksperti.
Lidhur me dyshimin e ekspertit të kriminologjisë, Ervin Karamuço, se sulmi mund të ketë ardhur nga Irani për shkak të ngjarjeve të fundit, Progni tha se ka të njëjtat mendime. Ai u shpreh se e ka hedhur si hipotezë, kjo për shkak të ngjarjeve. Më tej ai shtoi se është një sulm i kushtueshëm dhe është menduar afatgjatë.
“Realisht edhe unë e kam hedhur sot si hipotezë, për shkak të ngjarjeve. Është sulm shumë i kushtueshëm dhe është menduar afatgjatë. Unë mendoj që mund të lërë gjurmë teknike, që edhe mund të zbulohet dhe mund të merret si logjikë nga kush mund të ketë ardhur. Por është shumë e vështirë. Është bashkëpunim i disa shteteve për të parë nga ka ardhur sulmi”, tha Progni.
