Profesori i kriminalistikës, Ervin Karamuço, ka deklaruar se përveç Iranit është edhe Rusia që na ka sulmuar online. Sulmet të tilla, sipas Karamuços, janë akte terroriste. Qeveria shqiptare ndërpreu marrëdhëniet diplomatike me Iranin, pasi u goditëm nga tre sulme kibernetike nga grupe iraniane hackerimi.
Hetimet, në bashkëpunim me SHBA-në, arritën në përfundimin se bëhet fjalë për grupe iraniane, të lidhur me strukturat shtetërore. I ftuar në “ABC Live”, Ervin Karamuço tha se qëllimi i këtij sulmi është të shkaktojë terror, kaos dhe destabilizim.
“Duhet thënë se nga të gjitha sistemet kemi vetëm E-Albania, por të gjitha sistemet e tjera online, të bankës apo të mbrojtjes nuk janë prekur. Është një hartë shumë më e gjerë sulmesh dhe është për të gjithë rajonin. Është një sulm i mirëfilltë terrorist. Ka qëllim të destabilizojë rajonin. Nuk është vetëm Irani. Ka ardhur me shpejtësi. Edhe Kurti ka ardhur me shpejtësi në Tiranë”, tha Karamuço.
“Është edhe Irani edhe Rusia. Nuk janë lajme të rastësishme këto. Kaos, panik, destabilizim, terror i përgjithshëm, rënie qeverie. Dhe në vende pro perëndimore”.
Eksperti i kriminalistikës, paralajmëroi se priten arrestime dhe urdhër ndalime.
