Janë publikuar formacionet zyrtare që do të zbresin në fushë në përballjen e fazës “play-off” për në botërorin “Rusi 2018”, që do të zhvillohet mes Suedisë dhe Italisë. Të dy trajnerët kanë zgjedhur formacionet më të mira duke u bazuar në formën që po kalojnë lojtarët në këto moment.
Ventura ka hedhur në fushë një 3-5-2, ku në portë do të jetë i përhershmi Buffon, ndërsa para tij treshja Barzali-Bonucci-Chiellini. Mesfusha do të përbëhet nga De Rossi, Verrati dhe Parolo, ndërsa nga krahët do të jetë Candreva dhe Darmian. Sulmi i është besuar dyshes Belotti-Immobile, me këtë të fundit që është duke kaluar një formë fantastike tek Lacio dhe pritet të japë shumë në këtë ndeshje.
Nga ana tjetër Andersson do të zbresë me një formacion klasik 4-4-2. Ku në portë do të jetë Olsen, ndërsa para tij dysheja Lidelof-Granqvist, të mbështetur nga krahët nga Augustinsson dhe Krafth. Mesi i fushës përbëhet nga Larsson, Ekdal, Claesson dhe Forsberg. Maja e sulmit i është besuar dyshes Berg-Toivonen.
Mbetet për tu shijuar kjo sfidë që do të dhurojë spektakël edhe pasi ka një histori mjaft delikate mes tyre, ku në 2004, Suedia barazoi 2-2 me Danimarkën dhe lanë jasht Europianit Italinë.
