Shoqëria shqiptare po kërcënohet nga konsumimi i alkoolit nga nxënës të shkollave të mesme e deri edhe në 9-vjeçare.
Instituti i Shëndetit Publik ka bërë një studim, ku rezulton se 2 në 3 nxënës të klasave të nënta dhe viteve të para në gjimnaz, pohojnë të kenë konsumuar pije alkoolike. Ata kanë shutuar se ndonjëherë kanë arritur deri në dehje.
Gjithashtu nuk bëjnë përjashtim vajzat e kësaj grupmoshe. “67% e të rinjve kanë treguar që kanë konsumuar alkool. Madje ka një tendencë në rritje të vajzave që konsumojnë”, thotë Gentiana Qirjako, ISHP për tch.
Specialistë të Shëndetit Publik kanë dhënë alarmin për këtë fenomen në rritje pasi sipas tyre, përveç pasojave shëndetësore, te alkooli kane pikënisjen problemet e tjera sociale si dhuna dhe aksidentet e të tjera.
Për këtë arsye, Ministria e Shëndetësisë nëpërmjet Inspektoratit Shëndetësor Shtetëror ka intensifikuar kontrollet ndaj lokaleve apo subjekte të tjera, kryesisht pranë shkollave të cilat nuk respektojnë ligjin për të mos i tregtuar pijet alkoolike të rinjve nën 18 vjeç.
“Kërkojmë bashkëpunimin e të gjithë strukturave për të zbatuar në mënyrë rigoroze ligjin. Sipas të cilit subjekti ndëshkohet me gjobë nga 30 mijë deri në 200 mijë leke e deri në ndjekje penale”, tha Eltar Deda.
