Pavarësisht tërheqjes së Ministrisë së Arsimit, duke hequr pikën 4 në VKM, studentët janë të pakënaqur. Të rinjtë nga shumica e fakulteteve kanë nisur të marshojnë për të tretën ditë me radhë drejt Ministrisë së Arsimit, me kërkesat e qarta për përgjysmimin e tarifave të studimit, dhe përmirësimit të kushteve të konvikteve, sikurse edhe përfaqësimin në Bordin e Administrimit.
Në Vlorë, studentët e Universitetit “Ismail Qemali” kanë lënë sërish orët e mësimit, për të protestuar jashtë ambienteve të universitetit. Edhe në Elbasan, ku studentët janë mbledhur përpara “Aleksander Xhuvanit” dhe më pas do të nisen drejt Tiranës. Studentët e “Fan Nolit” të Korçës kanë hyrë në ditën e dytë të protestës. Ata kërkojnë plotësimin e kërkesave të tjera. Grumbullimi ka filluar në ambientet e jashtme të Korpusit universitar, me pjesëmarrjen e studentëve të fakulteteve të Ekonomisë, Edukimit dhe Bujqësisë.
Dje në media qarkulloi një dokument për Ministren e Arsimit, Lindita Nikolla, ku thuhej se ka pasur një mesatare 5.9 në degët e specialitetit tek Shkencat e Natyrës, ndërsa mesatarja e përgjithshme e saj ishte 6.8, dhe në degët shoqërore 7.2. E ftuar mbrëmë në emisionin “Open”, Nikolla u shpreh se matematika nuk ka qenë prirja e saj, por degën ia zgjodhi partia, pasi vetë donte të bëhej mjeke.
