Studentja e drejtësisë, Oneda Skënderi u shpreh se ka marrë pjesë në këtë manifestim, për t’u thënë ndal atyre që shkelin Kushtetutën.
Gjatë fjalës së saj, studentja deklaroi se mosrespektimi i parimeve të shtetit dhe mosrespektimi i funksionimit të tij i kalon kufijtë e normales.
Oneda Skënderi denoncoi gjithashtu edhe intimidimin që iu është bërë mediave dhe mosfunksionimin e tre sistemeve.
“Protesta u nda, sot jam këtu jo si ndonjë përfaqësuese e ndonjë partie politike por si një e re idealiste që nuk do ta braktisë vendin për shkak të paaftësisë apo mungesës së vizionit të disa politikanëve. Të mos respektosh parimet e shtetit të së drejtës dhe funksionimin e tij është të kalosh kufijtë. Të lësh vendin pa gjykatë kushtetuese është të kalosh kufijtë. Të mos lësh funksionimin e tre sistemeve është të kalosh kufijtë, të intimidosh mediat, të mos ofrosh shpresë, për familjet shqiptare, të rinjtë shqiptarë është të kalosh kufijtë. Ndaj për t’i thënë ndal atyre që shkelin Kushtetutën, të drejtat tona, shpresat tona, jam këtu që zëri i sovranit të dëgjohet dhe do dëgjohet medoemos”, tha ajo.
