Prej 8 ditësh studentët e universiteve publike kanë dalë në protestë. Ata duket se janë të vendosur për t’i shkuar deri në fund kërkesave të tyre. Ata nuk pranojnë dialog me kryeministrin, i cili u kërkon që të ulen dhe të bisedojnë për kërkesat e tyre.
Lidhur me këtë situatë, kreu i qeverisë ka reaguar sërish sot me anë të një shënimi në “Facebook”. Ai u kërkon studentëve që të mos humbasin kohë në protesta, por të ulen dhe të bisedojë.
REAGIMI I RAMËS
Të dashur studentë protestues,
8 PIKAT janë për mua vetëm pikënisja e një faze të re transformimi të botës sonë universitare. Dhe këtë transformim mund, duhet e do ta bëjmë VETEM SE BASHKU, përmes një Pakti për Universitetin mes studentëve dhe qeverisë.
Adresimin e 8 PIKAVE duhet të nisim pa humbur kohë. Kemi punë për të bërë dhe nëse doni që uljen e tarifave ta mbyllim para pushimeve tuaja të Vitit të Ri, s’ka realisht minuta për të humbur me llogjet e kazanëve dhe rrugët shkencore të Doktorreshë Monës e të Profesor Lulit.
Unë jam gati dhe s’kam asnjë kusht, prandaj bëhuni mbarë e më çoni fjalë, kur e ku doni të takohemi. Përqafime dhe kurajo, sepse do ju duhet shumë kur ta kuptoni që kjo që keni nisur është ku e ku më e madhe, sesa ato 8 PIKA:-)
