Kryeministri Edi Rama ka dalë në një konferencë për shtyp, ku ka folur për vendimet e marra në mbledhjen e qeverisë, lidhur me kërkesat e studentëve.
Në pikën e parë, janë 4 nënpika ku parashikohet se kush do të përfitojë për ciklin e parë të studimeve të larta.
Kështu, studentët me mesatare mbi 9 do të përfitojnë bursë prej 10 mijë lekësh dhe nuk do të paguajnë tarifën vjetore.
Po ashtu, edhe paraplegjikët, tetraplegjikët, të verbrit dhe studentët familja e të cilëve merr ndihmë ekonomike nuk do të paguajë tarifën vjetore si dhe do të marrin një bursë prej 10 mijë lekësh. Vendimi hyn në fuqi menjëherë.
Fjala e Ramës:
Sapo përfundoi mbledhja ku në fokus kemi pasur studentët dhe aspekte të tjera që janë vendosur në vëmendjen tonë si element përmbajtësor të dokumentit të paktit për universitetin, të cilin do ta bëjmë publik besoj në mesin e muajit të ardhshëm.
Në mbledhje kemi marrë disa vendime të rëndësishme që adresojnë kërkesat e studentëve dhe shkojnë përtej tyre, siç besojmë se është e domosdoshme për ta futur universitetin në një fazë të dytë të një reforme transformuese, e cila jo vetëm që nuk duhet të zbrazet, por duhet të thellohet.
Së pari, kemi miratuar 4 vendime të VKM lidhur me kërkesën e parë. Për përcaktimin e kategorive të individëve që plotësojnë kriteret për pranimin, për disa ndryshime, për përcaktimin e kritereve nga mbështetja e bursave dhe studentët në nevojë, së treti kemi ndryshuar vendimin për miratimin e kufirit maksimal.
Kemi ndryshuar vendimin 269 për përcaktimin e individëve që plotësojnë kriteret për pranimin në ciklin e studimit.
Këto 4 vendime që lidhen me kërkesën e parë shpjegohen me këto terma:
Së pari kemi studentët me familje me ndihmë ekonomike, të verbrit, paraplegjikët, tetraplegjikët që marrin financimin 100% të studimit dhe do përfitojnë një bursë prej 10 mijë lekësh të reja.
Së dytë studentët me notë mesatare mbi 9, do përfitojnë financimin nga qeveria 100% të tarifës së regjistrimit dhe në çdo program studimi, ata do përfitojnë një bursë prej 10 mijë lekësh të reja.
Së treti do t’i japim një mundësi të barabartë të gjithë studentëve, që të mos paguajnë tarifën, por do paguajë buxheti i shtetit për ta. Vendimi hyn në fuqi menjëherë./ TIRANA TODAY
