Jo vetëm në kryeqytet, por protesta studentore vijon edhe në rrethe. Studentët që kanë bojkotuar mësimin në universitetin “Aleksandër Xhuvani” akuzojnë se janë kërcënuar me mungesa nga pedagogët.
Akuza u bë nga studenti Visar Jashari, i cili foli për BalkanWeb. Ai tha se pedagogët kanë kërkuar që studentët të rikthehen në mësim përndryshe do të marrin mungesa, ndryshe nga urdhri i dekanatit që kishte njoftuar më parë se mungesat e tyre nuk do të merren.
Krahas Elbasanit, protesta vijon edhe në disa fakultete në Tiranë, ku studentët kanë zgjedhur të ngujohen brenda ambienteve deri në përmbushjen e kushteve.
