Studentët e Universitetit Bujqësor të Kamzës, kanë ecur në këmbë drejt Rrugës së Durrësit, ndërsa kanë bllokuar dhe hyrjen e autostradës Tiranë-Durrës.
Po kështu, studentë të të gjitha fakulteteve të Tiranës, janë mbledhur tek Ministria e Arsimit, për të protestuar për uljen e tarifave dhe lehtësinë e kushteve të tyre të jetesës.
Studentët vijojnë protestat masive në Tiranë, ndërsa protesta të mëdha po zhvillohen edhe në Elbasan, Durrës dhe Korçë.
Nga burime jo zyrtare mësohet se në Universitetin e Shkodrës, studentët kanë filluar të japin dorëheqjet e para. Raportohet se një prej studenteve të Fakultetit të Drejtësisë është dorëhequr nga Këshilli Studentor, si shenjë proteste ndaj tarifave të larta, dhe vendimit për të paguar për çdo provim të mbartur.
Këshilli Studentor është një organ i vetëqeverisur nga studentët, dhe ka si mision bashkëpunimin më të gjërë të studentëve me stafin pedagogjik, për nxitjen dhe zhvillimin e veprimtarive shkencore dhe përmirësimin e procesit akademik.
