Federata Shqiptare e Futbollit ka shtuar emrat që do të përzgjedhë për stolin e kuqezinjve. Zyra e FSHF-së bën të ditur se ende nuk është vendosur për trajnerin e ri, pasi dyshes Panuçi-De Canio i shtohet edhe një tjetër.
FSHF ka hyrë në bisedime edhe me Alberto Malesanin, ish-trajner i Parmës dhe Fiorentinës. 63-vjeçari, është një nga emrat më të spikatur në këtë garë, pavërësisht se jo shumë i njohur mediatikisht.
Kandidatura e tij vlerësohet shumë nga ana e grupit përzgjedhës të pasuesit të Gianni De Biasit, grup që drejtohet nga Presidenti i FSHF-së, Armand Duka, transmeton ‘‘Supersport.’’
E sigurt është se negociatat janë në pjesën e tyre finale, ku do të vendoset çdo gjë, ndërkohë që dilema e madhe është se cili do të jetë trajneri i ri i Kombëtares që do të udhëheqë kuqezinjtë në ndeshjet e mbetura të eliminatoreve të Botërorit, por, edhe në misionin në përpjekjen për kualifikim në Evropianin e vitit 2020.
