Këshilli i Ministrave miratoi të mërkurën vendimin që përcakton rregullat sesi do të përfitohet statusi i punonjësve të naftës dhe gazit, pas hyrjes në fuqi të ligjit, më 9 mars.
Në një deklaratë për shtyp nga selia e Kryeministrisë, ministrja e Shtetit për Marrëdhëniet me Parlamentin, Ermonela Felaj, tha se pas miratimit në shkurt nga parlamenti të ligjit për statusin e naftëtarit, Këshilli i Ministrave kishte detyrimin që brenda 3 muajve të nxirrte aktet nënligjore që sigurojnë zbatimin faktik të tij.
Sipas ministres Felaj, ligji për Statusin e Naftëtarit, nga i cili përfitojnë rreth 5 mijë naftëtarë në të gjithë vendin, është produkt premtimit të mbajtur të kësaj qeverie, por dhe i të gjitha reformave të rëndësishme të ndërmarra prej saj në 3 vjet e gjysmë.
Ligji “për Statusin e Naftëtarit” u njeh përfitime naftëtarëve që janë aktualisht në punë përsa i takon të drejtës për të dalë në pension para kohe, naftëtarëve që janë të papunë, të cilëve u njihet përparësi në punësim dhe nëse plotësojnë kushtet e përcaktuara në ligj, edhe një pagesë sa 80% e pagës minimale në shkallë vendi.
Ligji u njeh përfitim edhe të gjithë atyre që kanë dalë në pension. Sipas viteve të vjetërsisë në punë, ata do të përfitojnë 1% deri në 40% shtesë në masën e pensionit që marrin aktualisht, sqaroi ministrja.
