Mijëra protestues po shkojnë drejt zyrës së Kryeministrit në Rrugën e Luleve – rreth 20 minuta në këmbë larg qendrës kryesore të protestës Galle Face Green. Kryeministri Ranil Wickremesinghe kishte thënë se do të tërhiqej sapo të krijohet një qeveri e përkohshme gjithëpartiake, pas largimit të zotit Rajapaksa.
Por shumë qytetarë duan që ai të largohet menjëherë. Kjo ndodh sepse sapo z. Rajapaksa të largohet, sipas kushtetutës së Sri Lankës, zoti Wickremesinghe do të bëhej automatikisht ushtrues detyre i Presidentit për 30 ditë.
“Nëse nuk dëgjojmë për dorëheqjen e Presidentit dhe Kryeministrit deri në mbrëmje, mund të na duhet të mblidhemi dhe të marrim Parlamentin ose një ndërtesë tjetër qeveritare”, i kishte thënë më herët Reuters protestuesi Buddhi Prabodha Karunaratne.
“Ne jemi fuqishëm kundër qeverisë Gota-Ranil. Të dy duhet të largohen”.
Burimi i lajmit: BBC. Përshtatur nga Tirana Today
