Inspektorët e Etikës dhe Disiplinës pranë UEFA-s kanë ngritur një kërkesë për të dënuar ekipin e Skënderbeut me 10 vite pezullim nga çdo kompeticion i organizuar nga këta të fundit dhe 1 milion euro gjobë.
Ky nuk është një vendim përfundimtarë dhe kjo vërteton që ekipi i Skënderbeut nuk është dënuar akoma. Kjo kërkesë do të kalojë në komisionin e Disiplinës dhe Etikës në UEFA, ku do të shqyrtohen në detaje akuzat e ngritura nga inspektorët përkatës.
Akuzat janë ngritur nga avokati, Miguel Lietard Fernandez-Palacios dhe Karl Doht, ekspert bastesh. Dyshohet që ekipi korçarë të ketë trukuar ndeshje në pjesëmarrjen e tij në Europa League .
Në rast dënimi korçarët do të kenë të drejtën e ankimimit në CAS, e cila do të japë vendimin e fundit në lidhje me këto akuza.
Ja shkresa e plotë e dalë nga UEFA:
Kërkesa e inspektorëve të etikës dhe disiplinës së UEFA-s
Bazuar në konsideratat e sipërpërmendura, Inspektorët e Etikës dhe Disiplinës u kërkojnë Komisionit të Disiplinës së UEFA-s që:
1 – T’ia referojnë çështjen Komitetit të Apelit të UEFA-s në përputhje me nenin 34 (3) të Statutit të UEFA-s dhe nenit 29 (3) DR.
Në çdo rast, kërkohet me respekt që autoriteti përkatës i UEFA-s:
2 – Të deklarojë se Skënderbeu është i përjashtuar nga pjesëmarrja në kompeticionet e UEFA-s për dhjetë (10) vite.
3- Të vendosë një gjobë 1.000.000 për Skënderbeun.
Inspektorët e Komisionit të Etikës dhe Disiplinës ruajnë të drejtën për të ndryshuar raportin e tyre nëse vihen në zotërim të informacioneve të tjera në lidhje me këtë çështje.
Nyon, 7 shkurt 2018.
Miguel Lietard Fernandez-Palacios, avokat
Karl Doht, ekspert bastesh
Inspektorët e Komitetit të Etikës dhe Disiplinës të UEFA-s
Statuti i UEFA-s:
Nenin 34 (3):Organi i Ankesave ka juridiksion për të dëgjuar ankesat kundër vendimeve të Organit të Kontrollit, Etikës dhe Disiplinës në pajtim me rregulloret disiplinore në fuqi nga koha në kohë. Këto rregulla mund të parashikojnë që një rast t’i referohet në mënyrë të drejtpërdrejtë në Organin e Ankesave në rrethana urgjente, në veçanti lidhur me pranimin ose përjashtimin nga UEFA konkurse.
Nenit 29 (3):Në rast se votat e Komisionit të Disiplinës dhe Etikës shkojnë në barazim, atëherë vendimi i fundit vendoset nga Presidenti i UEFA-s. TIRANA TODAY
