Ministrja për Marrëdhëniet me Parlamentin Elisa Spiropali ka deklaruar nga foltorja e Kuvendit se ekonomia shqiptare në terma realë ka pësuar rritje.
“Sot mbi diskutimet e buxhetit, ne si qeveri kemi si detyrë të prezantojmë në Kuvend një pasqyrë sa më realiste të gjendjes ekonomike në tërësi. Reformat nuk kanë qenë të lehta, disa prej tyre kanë qenë të vështira, por të domosdoshme për të bërë shtet. Reformat edhe pse me kosto publike, qëllim të vetëm kanë dhënien e fryteve në shërbim të këtij viti. Gjatë vitit 2018-të ekonomia vijoi tendencën pozitive të rritjes. Rritja e PPB arriti në 4.1 %. Ky nivel është katër herë më i lartë se buxheti i rritur në 2013-ën. Asnjëherë nuk duhen harruar se në ç‘derexhe i gjetëm financat publike. Reformat shtet-bërëse shënuan kthesën e madhe dhe kanë prodhuar rezultate të pakundërshtueshëm, por ne nuk kënaqemi, po janë për të siguruar se jemi në drejtimin e duhur. Sipas Bankës Botërore papunësia në 2018-ën shënoi nivelin më të ulët në histori në 11.5%. BB thekson se ritmi i rritjes së vendeve të punës u përshpejtua në tremujorin e parë të 2019″, tha ajo.
Ministrja Spiropali u ndal edhe tek borxhi publik, ku tha se ky trend është në rënie, ndërsa shtoi se në objektiva afatmesëm ky borxh pritet nga 68 % që është aktualisht të zbresë në 60 % brenda dy vitesh. Buxheti i 2018-ës mundësoi arritjen e objektivave thelbësorë.
Buxheti 2018, bëri të mundur që shtresat në nevojë u kompensuan me skemat sociale, të cilat ishin tejet transparente. Politikat fiskale synojnë të mbajë në rënie borxhin publik në raport me prodhim e brendshëm bruto. Reforma ndaj informalitetit shënoi rritje të ardhurave. Borxhi publik ra në 68 %, duke vijuar trajektoren rënëse për të tretin vit radhazi”, tha Spiropali.
