Folësja e lajmeve Senada Jaho ka lënë Shqipërinë, për të krijuar një jetë të re në Shtetet e Bashkuara të Amerikës. Aty ajo është bërë edhe nënë.
Jaho zbuloi pak detaje nga momenti emocionues i ardhjes në jetë të bebit Khan, teksa ishte e ftuar në “Abc e Pasdites”.
“Bëra lindje çezariane e vendosur nga unë, nuk doja të riskoja sepse Khan ishte një beb i madh. Ishte 4 kile e gjysmë, i gjatë 64 centimetra. Por gjithçka shkoi shumë mirë”.
Si një person shumë i rezervuar, Jaho tha se arsyeja pse nuk shpërndau foto nga shtatzënia në rrjetet sociale ishte sepse donte “ta shijoja vetë, madje dhe familjes sime i kam thënë shumë vonë, në muajin e 5-të të shtatzënisë”. Senada rrëfeu se ditën e lindjes së Khan nuk e ndau me askënd, dhe shkoi e vetme me bashkëshortin në maternitet, e lajmin e zbuloi kohë më vonë.
Emrin Khan e ka zgjedhur si pasojë e dashurisë së madhe për historinë dhe “Khan” është një titull i lartë në Azi.
Senada Jaho zbuloi gjatë intervistës se do të ketë edhe një rikthim në Shqipëri e në punën e saj. Me ardhjen në jetë të djalit, ajo po e shijon këtë pauzë në jetën e saj.
“Patjetër që do të ketë një rikthim në Shqipëri, e në punën time. Unë e adhuroj atë profesion. Por çdo njeri ka nevojë për një pauzë në jetë. Ky ishte momenti më i bukur, ku unë mund të merrja një pauzë”.
