Liverpool dhe Tottenham kanë ndarë nga një pikë në përballjen dramatike mes tyre, e cila u mbyll në rezultatin 2-2. Gjithçka u vendos në minutat e fundit ku u shënuan tre gola dhe u shpërdorua një penallti.
Që në start ndeshja foli për Liverpool, pasi Salah që në minutën e 3’ gjen rrugën e rrjetës falë një gabimi në mbrojtjen e Tottenham. The Reds nuk e ul aspak ritmin dhe vazhdon të krijojë raste pafund, por që kanë vështirësi në finalizim. Tottenham është më konfuz në fushë dhe pas pësimit të golit aq shpejt nuk arrijnë të gjejnë kombinimin e duhur në fushë për të rrezikuar portën e kundërshtarit.
Por në pjesën e dytë janë djemtë e Pochettinos që futen në fushë dhe nuk i ndalin sulmet, duke e mbyllur Liverpoolin mbrapa. Salah, Firmino dhe Sane nisin disa kundërsulme mjaft të mira por që nuk arrijnë të kombinohen si duhet dhe nuk janë të rrezikshëm. Në minutën e 80’ fillon spektakli. I porsa-futuri në fushë Wanyama shënon golin e barazimit me një predhë nga distanca.
Vetëm pak minuta pasi barazuan, Harry Kane dështon ti japë avantazhin ekipit të tij pasi gabon nga pika e bardhë e penalltisë dhe Karius ia pret goditjen e dërguar në qendër. Në minutën e dytë shtesë Mohamed Salah driblon të gjithë mbrojtjen e Tottenham duke shënuar një gol magjik.
Por asgjë nuk kishte mbaruar, në minutën e fundit të ndeshjes erdhi një tjetër penallti pas një faulli ndaj Dier që këtë herë shndërrohet një gol nga Kane, i cili bëhet lojtari i parë i Tottenham që shënon 100 gola në Premier League. Një ndeshje e bukur, por një fund i çmendur në Anfield.
