Gjykata Speciale në Kosovë është në një fazë ku të gjithë partitë politike hedhin akuza ndaj njëra tjetrës pa marrë parasysh interesat e përgjithshëm të opinionit publik.
Kryetari i Lëvizës Vetëvendosje, Albin Kurti, ka marrë pjesë sot në një tryezë dedikuar Dhomave të Specializuara të Gjykatës Speciale. Në këtë tryezë, ai ka folur edhe për sipas tij marrëveshjen e presidentit Thaçi me faktorët ndërkombëtarë për Gjykatën Speciale.
Lideri i Vetëvendosjes Albin Kurti në diskutimin e sotëm ka thënë se Thaçi ka negociuar fshehurazi me faktorët ndërkombëtarë.
“Në fund të vitit të kaluar ishte një tryezë në të cilën presidenti aktual i Kosovës mori pjesë dhe dha një informacion interesant që nuk e kishim ditur më herët. Ai tha se për çështjen e Gjykatës Speciale, ai ka pasur marrëveshje me faktorët ndërkombëtarë. Në kohën kur ka qenë ministër i Punëve të Jashtme dhe zëvendës-kryeministër, ai kishte negociuar fshehurazi me faktorët ndërkombëtarë dhe kishte bërë një marrëveshje për të cilën tash po e pranon që është e gabueshme”, ka thënë Kurti.
“Edhe në ato momente ju e mbani në mend që Ambasadori britanik O’Connell e pati lëshuar tryezën. Sipas Presidentit, bashkësia ndërkombëtare i kishte premtuar atij se Kosova do të mund të aplikonte për anëtarësim në Këshillin e Evropës, të bëhet liberalizimi i shpejtë i vizave, të ketë mbështetje masive për anëtarësim në UNESCO, të bëhet themelimi i Forcave të Armatosura të Kosovës, dhe të kemi njohje të reja”- u shpreh Kurti.
Ai ka shkuar më tej ku thekson se pazari i Thaçit rezultoi të jetë i dëmshëm dhe njëherësh i gabuar për interesin kombëtar.
“Kësisoj Thaçi e pranoi që fshehurazi ka bërë pazar që doli se ka qenë i gabueshëm e i dëmshëm. Edhe ka bërë pazar, edhe e ka bërë fshehurazi, edhe doli gabim ai pazar. Ai tash duhet ta dëshmojë që nuk është duke e vazhduar pazarin. Për të dëshmuar që nuk e ka për vete dhe nuk po e vazhdon pazarin, duhet të jap dorëheqje, sepse ka përdredhur duart e shumë deputetëve në ditën e 3 gushtit që të anulohet moskalimi i Amendamentit 24 që i hapi rrugë Gjykatës Kushtetuese me 26 qershor”-shtoi ai.
