Interi do të përballet me Udinesen në një ndeshje mjaft decizive për objektivat e kampionatit. Luciano Spalletti në konferencën për shtyp u shpreh se duhet të lëmë pas atë që ndodhi me Juventusin dhe të dalim nga fusha në këtë sfidë vetëm me fitore. Trajneri zikaltër nuk ka preferuar të komentojë atë që ndodhi përballë bardhezinjve , duke e cilësuar si të shkuarën tashmë.
“Nuk dua të flas më për ndeshjen me Juventusin, pasi ajo ka kaluar tashmë. Duhet të përqendrohemi dhe të japim më të mirën deri në fund, duke marrë 9 pikët e mbetura në lojë, pasi vetëm kështu mund të synojmë të realizojmë objektivin tonë. Skuadra është e karikuar dhe zhgënjimin ndaj bardhezinjve duhet ta shndërrojmë në forcë për të përballur me frymën e duhur 3 takimet e fundit”, deklaroi Spalletti.
Ndërsa sa i përket formacionit përballë Udineses, Spalletti nuk preferoi të japë detaje, por u shpreh se e ka të qartë në kokë formacionin, duke lënë akoma të hapur garën nëse do të luaj Santon apo Dalbert.
“Besoj se e kam të qartë kush do të luajë nesër, por nuk preferoj ta them. E sigurt është që do të luajë njëri mes Dalbert dhe Santon. Këtë të fundit e kam parë mirë gjatë javës, pavarësisht se u kryqëzua padrejtësisht. E kam riparë ndeshjen dhe jam i bindur që nuk e humbëm për faj të tij, pasi nuk pati asnjë gabim me peshë të Santon, ndaj edhe më duket e padrejtë që t’i drejtohet gishti pikërisht atij”, tha trajneri i Interit.
Luciano Spalletti mendon se Brozoviç dhe Rafinha do të japin një kontribut të rëndësishëm në këtë sprint final, ndërsa ka besim se skuadrat romane do të gabojnë dhe Interit do të ketë shanset e vetë për zonën Champions.
“Mendoj se ne duhet të bëjmë mirë pjesën tonë, duke luajtur mirë dhe marrë maksimumin në 3 takimet e mbetura, ndërsa më pas kundërshtarët do të gabojnë dhe mund të rikthehemi në zonën Champions. Rafinha është rikuperuar plotësisht dhe ka një gjendje mjaft të mirë fizike, ndaj bashkë me Brozoviçin do të na japinë një dorë drejt triumfit në sfidat e mbetura”, tha Luciano Spalletti.
