Trajneri i Interit, Luciano Spalletti, ka folur në prag të sfidës së kampionatit ndaj Cagliari-t, por ka komentuar edhe përballjen me Fiorentinën dhe “çështjen” Icardi. Te kjo e fundit Spalletti e humb qetësinë, duke deklaruar se nuk ka ndërmend të flasë më për argjentinasin.
“Është e qartë që ka mbetur pak keqardhje, sepse ndeshjen e luajtëm mirë, menduam se morëm 3 pikët. Gjithsesi, nuk mund të qëndrojmë me kokën pas, duhet të përqendrohemi te ndeshja e radhës. Me VAR është krijuar një mekanizëm perfekt, si makineri, por makinat duhen ngarë mirë. Nuk kam këshilla të veçanta, duhet të mësohemi me VAR, sepse është shumë i rëndësishëm dhe duhet përdorur, sa herë të jetë nevoja në një ndeshje.
Ka të drejtë Pioli, po bëjmë shumë rrëmujë. Me sa duket, nëse të përplaset topi në gjoks si në rastin e D’Ambrosio, është penallti, ndërsa nëse të përplaset në gishta si ndodhi me Hugon, nuk është penallti”, u shpreh Spalletti.
“Janë thënë shumë gjëra. Ka folur Marotta, ka folur Zhang. Tani e tutje unë nuk flas më për ata që nuk janë me ne. Nuk do flas më për Icardin. A pres që të flasë Icardi? Unë duhet të flas për të tjerët, që zbresin në fushë dhe e kanë për zemër Interin”, shtoi tekniku zikaltër.
Cagliari-“Është një kundërshtar që e di si duhet të sillet në Serinë A, i njeh mekanizmat që duhet të përdorë. Pavoletti në sulm i krijon probleme çdo mbrojtjeje, ndaj duhet kujdes, pasi kemi përballë një kundërshtar që luan mjaft i mbledhur dhe del shumë shpejt në kundërsulm”.
