Pas një starti të vështirë, Interi i Spallettit është duke kaluar një formë mjaft të mirë, pasi ka marrë fitoren e tretë radhazi dhe ndodhet në vendin e katërt, me vetëm dy pikë më pak se vendi i dytë që mbahet nga Napoli. Pas fitores së marrë këtë fundjavë ndaj Cagliarit trajneri italian i zikaltërve është shprehur mjaft i lumtur dhe nuk ka nguruar që ti kompilmentojë futbollistët e tij.
Një nga notat më pozitive të mbrëmjes ishte ajo e brazilianit Dalbert, i cili erdhi vitin e kaluar në Milano për shumën e 25 milionë eurove, por pas një viti mes vështirësish, më në fund duket se po arrin të shprehet mirë në fushën e lojës.
“Dalbert ka shumë cilësi dhe sonte luajti ndoshta ndeshjen më të mirë, që kur ka ardhur te Interi. Kjo u kuptua edhe nga publiku, që e mbështeti disa herë nëpërmjet ovacioneve. Dalbert është një djalosh shumë interesant dhe punëtor, që ka goditje të ngjashme me Roberto Carlosin, por duhet ende shumë që të arrijë në nivelet e patriotit të tij”, deklaroi trajneri i Interit.
Lautaro Martinez ishte autori i një goli mjaft të bukur në sfidën e djeshme ndaj Cagliarit, teksa Spalletti nuk i kurseu komplimentet ndaj argjentinasit, por tha se është e vështirë që ai të luajë bashkë me Icardin.
“Lautaro është një sulmues që di të luajë mjaft mirë mes mbrojtësve kundërshtarë, ka intuitë dhe kapacitet për të finalizuar,. Për më tepër, është stërvitur me Mauron dhe ka mësuar shumë edhe për të sulmuar zonat kundërshtare. Më pas për të luajtur në krah të Icardit është pak e vështirë, pasi do të na prisheshin ekuilibrat mbrapa, ndaj duhet parë me kujdes një hap i tillë”, tha Spalletti.
