Çerekfinalja e Kupës së Italisë na sjell një supersafidë, ku pas shumë vitesh do të kemi derbin e Milanos në këtë kompeticion. Të dyja ekipet vijnë në një formë jo të mirë, por kur bëhet fjalë për derbin situata ndryshojnë dhe lojtarët japin maksimumin. Spalletti ka mbajtur lart moralin e skuadrës edhe pse vjen nga dy humbje, duke u shprehur se fati nuk ishte në anën e tyre në këto ndeshje dhe se gjithçka ka kaluar. Gjithashtu ai ishte i qartë kur tha se kur bëhet fjalë për derbi, nuk diskutohet çfarë rëndësie ka trofeu, qoftë edhe miqësore ai duhet fituar.
“Derbi është gjithmonë një sfidë special, edhe kur është miqësore. Sfida të tilla nuk luhen, por fitohen dhe ne jemi gati të bëjmë diçka të tillë. Nga pikëpamja individuale, jam i bindur se të gjithë do të japin më shumë se 100 %, jo vetëm për faktin se luajmë një derbi, por edhe se Kupës duam t’i shkojmë deri në fund”, u shpreh trajneri i Interit.
Zikaltrit vijnë pas 2 humbjeve radhazi në kampionat dhe për më tepër ndaj 2 kundërshtarësh të kalueshëm, por për Spallettin nuk ka vend për dramë, pasi skuadra thjesht ka qenë e pafat.
“Me Udinesen kontrolluam lojën në 45-minutat e para, por nuk ia dolëm të mbyllim ndeshjen dhe u ndëshkuam në të pjesën e dytë me kundërsulme. Ndaj Sassuolos nuk kam asgjë për të ndryshuar, sepse pësuam me të vetmin rast të kundërshtarit, ndërsa me pak fat mund të kishim shënuar minimalisht 5 herë. Gjithsesi, tani duhet të tregojmë forcën tonë, sepse na presin disa sfida të vështira, duke filluar nga derbi, e deri të ndeshja me Romën më 20 janar”, tha Luciano Spalletti.
