Deputeti socialist Alqi Bllako, reagoi dje pas urdhër-arrestit të lëshuar nga SPAK, pasi akuzohet për aferën e inceneratorëve. Bllako shprehet se është i tronditur, dhe se një proces i drejtë do të provojë pafajësinë e tij. Ai ndër të tjera thekson se nuk do të përdorë si mburojë mandatin e deputetit, dhe se ka mburojë pafajësinë e tij. Po kështu ka vendosur ti paraqesë dorëheqjen Parlamentit, dhe do të përballet me akuzën pa asnjë privilegj.
Ja se çfarë shkruan ai
Të nderuar miq!
Natyrisht jam i tronditur nga kërkesa e SPAK-ut për ndalimin tim. Kam bindjen e thellë që një proces i paparagjykuar dhe i drejtë do ta provonte lehtësisht pafajësinë time; me bindjen e palëkundur se as kam shkelur kurrë ligjet e vendit e madje as kam thyer kurrë etikën e detyrës që kam ushtruar!
Sidoqoftë, nuk ka arsye të angazhohet Kuvendi i Republikës së Shqipërisë për këtë çështje dhe as nuk dua të përfitoj apo të më ofrohet një trajtim ndryshe nga çdo qytetar tjetër i vendit tonë.
Unë nuk kam mburojë mandatin e deputetit, por të vërtetën për pafajësinë time. Këtë do ta provoj në gjykatë dhe përpara opinionit publik.
Prandaj kam vendosur që ditën e nesërme t’i paraqes Kryetares së Kuvendit dorëzimin e mandatit tim si deputet i Republikës së Shqipërisë, dhe të përballem me akuzën pa asnjë privilegj. Si një qytetar i zakonshëm, si prind dhe familjar i përgjegjshëm; dhe mbi të gjitha si një shërbëtor publik, që padyshim e kupton se çdo angazhim vjen edhe me çmimin e përbaltjes politike apo edhe me detyrimin e sqarimit të së vërtetës para drejtësisë!
Ju jam thellësisht mirënjohës për mbështetjen!
Mezi pres t’u provoj të vërtetën dhe të drejtën e pastër miqve, dhe padyshim armiqve!
Majko drejt rikthimit në Parlament
Arrestimi i Bllakos nuk mund të bëhet pa një vendim nga Kuvendi, më konkretisht nga Këshilli Rregullores, Mandateve dhe Imunitetit, që pritet të mblidhet sot në orën 18:00 për t’i hapur rrugë drejtësisë të veprojë. Por nëse Komisioni i Mandateve lejon arrestimin e Bllakos, atëherë një tjetër socialist merr postin e tij. Në bazë të listave të kandidatëve, në zgjedhjet e 25 prillit pas Bllakos është i renditur në listë Pandeli Majko.
Majko u rendit në vendin e 19-të dhe mori 8790 vota ndërkohë që i duheshin 12602 vota për të thyer herësin. Ndërsa Dallëndyshe Bici e listuar në numrin 21 me një sasi votash prej 4977. Alqi Bllako u zgjodh deputet në 25 Prill nga lista e qarkut të Tiranës. Ai ishte renditur i 17-ti në listë, ndërkohë që PS-ja fitoi 18 deputetë në këtë qark.
