Ditën e sotme në orën 10:00 rinis protesta e studentëve, të cilët kërkojnë plotësimin e 8 kërkesave. Studentët e ndërprenë protestën për festat e fundvitit, për t’u rikthyer sot përpara Kryeministrisë.
Prej ditësh ata kanë bërë thirrje në rrjetet sociale dhe në media që qytetarët t’i bashkohen kauzës së tyre.
Madje, ata kanë shpërndarë fletëpalosje në qindra shtëpi në Tiranë. Megjithatë, thirrje për t’iu bashkuar protestës së studentëve kanë bërë edhe partitë opozitare, konkretisht Partia Demokratike dhe Lëvizja Socialiste për Integrim.
Prej ditësh Kryemadhi ka vijuar takime me studentët dhe strukturat e LRI-së, ku u ka bërë thirrje studentëve dhe qytetarëve që të braktisin flamurin e partisë dhe t’u bashkohen studentëve për të larguar të keqen e këtij vendi që sipas saj është Rama.
Ndërkohë, Partia Socialiste i ka cilësuar këto thirrje si një përdorim të studentëve nga ana e partive opozitare.
Kujtojmë se studentët nuk kanë lejuar bashkimin e PD-së dhe LSI-së për t’iu bashkuar protestës së tyre, pasi nuk duan ta politizojnë atë. Nuk dihet nëse sot do të ndodhë e njëjta gjë, apo do të ketë një bashkim të palëve të pakënaqura me qeverinë./ Tirana Today
