Biznesmeni miliarder George Soros, ka paralajmëruar se Evropa mund të bjerë në harresë. Në një artikull publikuar për “Marketwatch”, Soros tha se BE-ja do të përballet me rrugën e Bashkimit Sovjetik nëse njerëzit nuk veprojnë për ta shpëtuar atë.
“Europa po ecën përgjumur në harresë dhe populli i Europës duhet të zgjohet para se të jetë tepër vonë.
Nëse nuk e bëjnë këtë, Bashkimi Europian do të ecë si Bashkimi Sovjetik në vitin 1991. As udhëheqësit tanë, as qytetarët e zakonshëm nuk e kuptojnë se po përjetojmë një moment revolucionar, se spektri i mundësive është shumë i gjerë dhe se rezultati përfundimtar është në këtë mënyrë shumë i pasigurt”, shkruan miliarderi.
Sipas tij, zgjedhjet e ardhshme për Parlamentin Europian në maj të këtij viti do të jenë të rëndësishme për të ardhmen e kontinentit, por ai argumentoi se partitë e anti-Europës do të gëzojnë një avantazh konkurrues.
Sa i takon Brexit, Soros argumenton se është kundër saj, teksa e quan largimin e menjëhershëm të Britanisë si “ngjarja përcaktuese për vendin për dekada të tëra”.
