Kur gjendemi ende në valën e fushatës elektorale, IPR Marekting ka kryer sondazhin mbi partitë politike që do të garojnë më 25 qershor. Ajo që ra në sy, ishte tkurrja e partive kryesore dhe shfaqja në skenën politike e LIBRA-s me 2.3 për qind në rang kombëtar. Ndërsa Partia Drejtësi për Integrim dhe Unitet nuk ka arritur dot as 2 për qindëshin, duke qëndruar në nivelin e 1.8 %.
“Tirana Today”, pyeti përmes moderatores, Ilva Tare, drejtuesin e këtij sondazhi, italianin Antonio Note, se përse PDIU nuk kishte arritur as tek 2 përqindëshi në këtë sondazh. Note u përgjigj se kjo forcë politike i qëndron votave të fituara në vitin 2013 dhe nuk ka reflektuar asnjë rritje në këtë sondazh. “Në përgjigje të pyetjes suaj PDIU i qëndron votave të fituara në vitin 2013”.
“Interesante janë krahasimet me zgjedhjet e 2013, PS është rritur me 1.7%, ndërsa PD me 6 pikë. Edhe LSI është në rritje ne nivel kombëtar me 1.5 pikë. Për LIBRA-n nuk mund të bëjmë krahasime se nuk ka qenë në zgjedhje. Ndërsa të gjithë partitë e tjera janë poshtë pragut”.
Duke iu përgjigjur interesimit të “Tirana Today” për rezultatet e këtij sondazhi, kreu i PDIU-së, Shpëtim Idrizi theksoi se ky është një sondazh që nuk përputhet aspak me realitetin e kësaj force politike.
“Unë nuk e di si ta shpjegoj. Po di që si gjithmonë ky lloj sondazhi na ka nxjerrë në 3 sondazhet gjithmonë poshtë realitetit, vetëm në exit-poll i afrohej realitetit. Por, nuk ndikohemi se e njoh këtë teknikë për llogari të dikujt aq më shumë që me partitë e vogla marzhi i gabimit është 3 për qind. Aq votues sa na nxjerr ky sondazh, unë i kam në hapjen e fushatës në Pallat të Kongreseve”, thekson Idrizi.
Sondazhi
Sondazhi i publikuar mbrëmjen e së mërkurës është realizuar në datat 29 dhe 30 maj. Janë pyetur 2002 persona. Në anketim janë të përfshirë dhe votues për herë të parë. Marzhi i gabimit është +/- 2.5%. Rezultatet e sondazhit janë një fotografi e 31 majit, fillimit të fushatës dhe që kjo mund të ndryshojë në ditët në vijim.
(TIRANA TODAY)
