Ish-prokurori i Përgjithshëm, Theodhori Sollaku këshillon kryeprokuroren e përkohshëm që të lexojë mirë ligjin. Në intervistën e mbrëmjes në Ora News, Sollaku tha se i sheh të diskutueshme lëvizjet e fundit në organin kryesor të akuzës. Sollaku shpjegon se kryeprokurorja e përkohshme duhet që të respektojë mirë dispozitat dhe kompetencat që janë shkruar, sepse në të kundërt mund t’i kthehet në boomerang.
“Prokurori i Përgjithshëm është ai që do të marrë mandatin 7 vjeçar por edhe kjo që është e përkohshme ka kompetenca shumë të kufizuara. Nuk ka kompetencë në politikën e kuadrit, mund të bëjë disa riparime në zyrën e prokurorit të përgjithshëm siç ka filluar ti bëjë, edhe këto janë të diskutueshme. Por mendoj që për mirëfunksionimin e institucionit të prokurorisë duhet që prokurori i përgjithshëm të lexojë mirë ligjin, të respektojë mirë dispozitat dhe kompetencat që janë shkruar, sepse në të kundërt mund t’i kthehet në boomerang“, deklaroi Sollaku.
Ndërkaq zgjedhjen e Kryeprokurores ai e shikon si një procedurë normale përtej “luftës politike” të partive.
“U bë një procedurë normale, mbaroi mandati i ish-prokurorit të përgjithshëm, duhej zgjedhur një prokuror për këtë periudhë derisa të krijohet KLP në pritje të zgjedhjes së prokurorit të përgjithshëm me një mandat 7 vjeçar. Situatë normale, pavarësisht nga lufta politike që u bë në parlament, vakumi u plotësua dhe situata besoj është drejt normalizimit pavarësisht deklaratave politike që ende vazhdojnë jo me personin që u zgjodh prokuror i përgjithshëm por me procedurat, këto janë pjesë e luftës politike,” tha Sollaku.
