Skënderbeu është treguar i pamëshirshëm edhe në sfidën e dytë përballë Mamurrasit duke e shpartalluar 9-1, në kuadër të Kupës së Shqipërisë. Korçarët kishin firuat edhe në ndeshjen e parë me rezultatin e thellë 8-0, por edhe në ndeshjen e kthimit që u zhvillua ditën e sotme nuk janë kursyer me golat.
Formacioni i zgjedhur nga Ilir Daja ishte i përbërë nga lojtarë që kanë qëndruar në stol deri më sot dhe nuk kanë arritur ta tregojnë vetën në një ndeshje zyrtare. Për këtë arsye në momentin që atyre u jepet rasti përpiqen të japin më të mirën për të bindur trajnerin. Nespor dhe Shkodra, dy lojtarë të ardhur me shumë bujë nuk po gjejnë vend në formacionin bazë të ekipit, e po shfrytëzojnë çdo mundësi që u jepet për të shënuar. Fat i keq për Mamurrasin që iu desh të përballet me Skënderbeun që këtë vit po kalon një formë shumë të mirë, ku ka mundur rivalët kryesorë në kampionat dhe ka bërë paraqitje dinjitoze në Europa League.
Golat për Skënderbeun u realizuan nga: Nespor (2), Mara (2), Shkodra, Gripshi, Liqeri, Lulaj dhe Tako.
