Skënderbeu vazhdon të mbajë kreun e renditjes duke mos lëshuar terren ndaj kundërshtarëve të tij. Këtë e tregoi edhe në ndeshjen e sotme, kur mposhti 4-1 Teutën e Durrësit. Skuadra korçare tregoi forcën e saj duke përmbysur gjithçka në pjesën e dytë të takimit, pas golit të shpejtë të shënuar nga Latif Amadu.
Megjithëse vinte nga një ndeshje e fortë ndaj Partizanit të Beogradit të javës së kaluar në Europa Legue, Skënderbeu tregoi një nivel të lartë fizik në fundin e javës së 7-të të Superligës, për një sfidë që pritej të ishte tejet delikate.
Trajneri Ilir Daja e nisi ndeshjen me lojtarët titullarë, i njëjti formacion që luajti ndaj serbëve javën e kaluar, me ndryshimin e vetëm, Alitin në vend të Radas. Nga ana tjetër, Gugash Magani u prezantua me skemën e zakonshme 4-3-3 dhe qendërsulmuesi Latif Amadu ia shpërbleu me një gol të shpejtë por që nuk mjaftoi për të gjithë ndeshjen.
Pjesa e dytë ishte tjetër histori. Gjithçka foli për Skënderbeun. Korçarët e nisin furishëm që në minutën e ‘49 duke barazuar rezultatin me anë të Takut, i cili përfitoi falë një asist të Sowes. Kaq mjaftoi që Skënderbeu të kalojë në avantazh me anë të Sabien Lilajt, i cili shndërroi në gol një 11-metërsh të fituar më parë nga James. I palodhuri Sowe arriti të gjejë rrugën e rrjetës pas një kërcimi fantastik me kokë në minutën e 71, ndërsa tregoi se ai mbetet përzgjedhja e duhur e trajnerit Daja.
Me rezultatin 3-1, Teuta vazhdoi të lëshojë terren në fushë aq sa pësoi edhe golin e katërt përmes një 11-metërshi që u ekzekutua nga Gjergji Muzaka. Teuta dorëzohet në fushën e saj, ndërsa Skënderbeu shënon fitoren e 6-të në 7-të javë kampionat. Korçarët mbajnë me forcë kreun ndërsa “kërcënohen” nga Kukësi që i ndjek me 3 pikë diferencë. Dueli i radhës së Skënderbeut është me Luftëtarin, që pritet të ketë njëjtin fat si Teuta. Ndërsa për këtë të fundit kanë filluar të fryjnë erërat e ftohta të detit, që pas 3 humbjeve rresht gjendet vetëm 2 pikë larg zonës së rënies nga Superliga. Dhe nëse vijon me këto rezultate vitin tjetër “djemtë e detit” mund ta gjejnë veten në kategorinë e I, shijen e së cilës e kanë provuar skuadra me histori si Partizani dhe Tirana. (TIRANA TODAY)
FORMACIONI I NDESHJES
Teuta: Moçka, Beqja, Shkalla, Hrkaç, Hakaj, Hila, Lena, Dosti, Çyrbja, Dosti, Latif. Trajner: Gugash Magani.
Skënderbeu: Shehi, Vangjeli, Jashanica, Aliti, Mici, Dita (Osmani 30′), Muzaka (Shkodra 79′), Lilaj, Taku, James, Soëe. Trajner: Ilir Daja.
Gjyqtarë: Klajdi Kola, Egin Doda, Ermal Barushi, Gernat Qirici
Delegati: Lysien Nurishmi; Vëzhgues: Sokol Jareci
Kartonë të verdhë: Dediç 46’/ James 37′, Osmani 47′, Mici 60′
RENDITJA
