Pasojat tek Skënderbeu kanë ardhur menjëherë pas lënies në fuqi nga KAS të vendimit të UEFA-s për ta pezulluar ekipin korçar nga europa. Sabjen Lilaj është largimi i parë nga ekipi dhe ka firmosur me ekipin e ri për sezonin e ardhshëm.
Mesfushori i kombëtares shqiptare ka arritur marrëveshjen me Qabalan, që luan në Azerbajxhan. Kjo ishte një nga pistat e mundshme që ka qarkulluar prej kohësh për të ardhmen e këtij futbollisti, ndërsa gjithçka është zyrtarizuar në ditën e sotme. Kalimi i Lilajt te Qabala u mundësua nga menaxheri Franci Bode.
Qabala është një nga ekipet më të mira në kampionatin azer, pasi është renditur në vendin e dytë menjëherë pas Karabakut, duke siguruar arritjen në “Europa League”. 29-vjeçari nga Maliqi, ishte pjesë e Skënderbeut që prej sezonit 2012, ndërsa tani do të largohet për një aventurë të re në kampionatin azerbajxhanas.
Lilaj është pjesë dhe e ekipit Kombëtar, ku është aktivizuar 14 takime me fanellën kuqezi. Kujtojmë që për mesfushorin, interesoheshin edhe klubet si Palermo, Karabak dhe Neftçi, por oferta e Qabalës ka qenë e pa rezistueshme.
