Sonte do të zhvillohet ndeshja e shumëpritur në Beograd mes Skënderbeut dhe Partizanit, e cila do të ketë vëmendje të lartë edhe nga UEFA, për shkak të incidenteve të mundshme. Korçarët udhëtojnë me misionin e vështirë të fitores, pasi kërkojnë që të mbajnë gjallë shpresën për të bërë hapin historik, për të kaluar përtej fazës së grupeve në Europa League.
Ilir Daja bashkë me ekipin kanë studiuar kundërshtarin dhe janë të vetëdijshëm që do të kenë një ndeshje mjaft të vështirë, prandaj po përgatitet në detaj. Daja ka vendosur të hedhë në fushë një formacion 4-3-3 dhe do të jenë lojtarët më të fortë në formacion. Do të praktikohet nja lojë sulmuese, pasi Skënderbeu nuk ka çfarë të humbë në këtë sfidë dhe do të kërkojë të marrë maksimumin. Me Gavazajn e rikthyer pas atij dëmtimi, sulmi korçarëve do të jetë edhe më i rrezikshëm. Mesfusha do të jetë e njëjta me atë të ndeshjes së parë, me Lilajn, Muzakën dhe Takun. Në portë i padiskutueshmi Orges Shehi, i cili viziton për herë të dytë Beogradin, ndërsa krahët e mbrojtjes do të formohen nga Mici dhe Vangjeli. Qendra e mbrojtjes do të jetë Radas dhe Jashanica, të cilët kanë pasur disa dëmtime të lehta në javët e fundit por duket se i kanë kaluar.
Partizani i Beogradit do të hedhë në fushë të gjithë armatën e tij dhe do të praktikojë një futboll më ofensive se ai që u pa në “Elbasan Arena”. Por është konsoliduar edhe mbrojtja, pasi presioni është mjaft i madh mbi vendasit për të mos rrezikuar humbjen që do të ishte dramatike për serbët në stadiumin e tyre.
Formacioni i Skënderbeut: Shehi, Vangjeli, Jashanica, Radas, Mici, Taku, Lilaj, Muzaka, Gavazaj, James, Sowe.
Formacioni i Partizanit: Stojkovic, Miletic, Miletic, Mitrovic, Vulicevic, Everton, Jevtovic, Jankovic, Tosic, Tavamba, Ozegovic.
