Reforma e nisur në sistemin e drejtësisë ka hyrë në një fazë të nxehtë, ndërsa nuk kanë munguar shkarkime në prokurori,emërime të reja në burgje, takimet e fundit të trupës diplomatike me drejtues institucionesh dhe ministra. Kjo tregon jo pak për këtë fazë transitore të reformës.
Ambasadori amerikan Donald Lu, teksa zhvilloi një takim me ministrin e Brendshëm Xhafaj ka deklaruar se Amerika do të asistojë nëpërmjet angazhimit të FBI-së, që të hetojë ish-ministrin e Brendshëm, Saimir Tahiri. Kjo deklaratë zgjoi interes të madh te publiku, ndërsa media ishte me sy e veshë tek kjo deklaratë.
Të gjitha këto japin arsye objektive, se tashmë procesi i skanimit të drejtësisë s’ka kthim pas. Gjatë ditës së sotme Prokurorja e Përgjithshme e përkohshme, zhvilloi një takim me përfaqësues të misionit “EURALIUS”.
Mësohet se pjesë e diskutimeve ka qenë procesi i nisur tashmë i Vettingut, ndërsa është theksuar se ky proces duhet të ecë përpara si shenjë perspektive për Shqipërinë.
Gjithashtu është theksuar se procesi i vlerësimit të figurës së prokurorëve është shumë i rëndësishëm për garantimin e Reformës në Drejtësi. Gjatë bisedës së Markut me përfaqësues të misionit të “EURALIUS” është theksuar se duhet të forcohet integritetit i prokurorëve ndaj krimit të organizuar dhe trafiqeve.
Prokurorja Marku garantoi mbështetjen e pakufishme ndaj këtij procesi duke shtuar se lypset një bashkërendim i ndërsjellë në këtë proces. Kjo synon që ky proces do të mbyllë sa më shpejt reformën,duke sjellë përfundime të kënaqshme në fushën e korrupsionit dhe krimit të organizuar.
