Juristi i njohur Sokol Hazizaj thekson se e vetmja zgjidhje për Bashkinë e Shkodrës, janë mbajtja e zgjedhjeve të reja, pas tërheqjes së Valdrin Pjetrit.
“Duke mos qenë as para përfundimit para kohe te mandatit, dhe as përpara ekzistencës se një kryetari te mandatuar, zgjedhja e re për kryetar te Bashkise Shkoder është alternativa e vetme, që ngelet për shkak te parashikimeve te kushtetutës, kodit zgjedhor dhe ligjit te sipërcituar”, sqaron Hazizaj në një prononcim për Politiko.
Valdrin Pjetri, dalë nga procesi i 30 qershorit, dha dorëheqjen pas akuzave të Partisë Demokratike se ka qene i dënuar me 18 muaj burg në shtetin italian, për shpërndarje droge. Socialisti nuk i ka mohuar akuzat, duke e cilësuar arrestimin dhe dënimin si “ngjarje banale e ndodhur në mes të shokëve të mi bashkëstudentë”.
Për herë të parë ai pranon ndodhinë e 17 viteve, por thekson se ka qenë një ngjarje banale mes tij dhe bashkëmoshatarëve të tij, dhe se nuk ka lidhje me të, por u nxor jashtë kontekstit duke ngritur akuza politike.
Aventurën e tij për të qenë një ditë kryebashkiak i Shkodrës, Valdrin Pjetri e quan “një ëndërr të bukur”, nga e cila ai është i detyruar të heqë dorë për shkak të së kaluarës së tij në vendin fqinj, Itali. “Ishte një endërr e bukur t’i jepnim Shkodrës atë ç’ka meriton. Por fatet e një qyteti nuk duhen të jenë kurrë të lidhura pashmangshmërisht me fatet e një individi, cilido qoftë ai”.
