Sulmet kibernetike dhe paralajmërimi i fundit i “HomelandJustice” për nxjerrjen e informacioneve, janë rikthyer sërish në fokus, ku eksperti i kriminalistikës, Ervin Karamuço ka folur për skenarin iranian.
Eksperti i mëshon faktit se ka qenë një i brendshëm, i cili i ka ndihmuar hakerat për të hyrë në sistem. Ai hodhi hipotezën se pjesë e grupit mund të jenë edhe shqiptarë, që kanë interes të caktuar. Po sipas tij, hetimi në fjalë nuk mund të bëhet vetëm me një prokuror, pasi duhet një skuadër e mirëfilltë. Ervin Karamuço u shpreh më tej se nëse informacionet e shpërndara nga hakerat janë të vërteta, atëherë duhet të themi se jemi në kushtet e gjendjes së Emergjencës Ndërkombëtare.
“Në sistem nuk mund të hysh pa një të brendshëm, pra ne duam të dimë se kush e “la derën hapur”. Nuk mund të jenë vetëm iranianë, mund të jenë edhe grupe shqiptare që kanë interes të caktuar. Prokuroria ka kërkuar që të mbyllen faqet e internetit. Ata që “e lënë derë hapur”, mund të jenë persona të cilët nuk janë vlerësuar siç duhet. Ky hetim nuk mund të bëhet vetëm me një prokuror, duhet një skuadër e mirëfilltë. Nëse informacionet e shpërndara nga hakerat janë të vërteta, atëherë duhet të themi se jemi në kushtet e gjendjes së Emergjencës Ndërkombëtare. Dalja e të dhënave nga hakerat, që përfshiu rreth 1500 emrave të punonjësve të sigurisë së shtetit, është një shantazh”.
Sa i takon kërcënimeve për sulme me dron në zonën e MEK, Karamuço tha se kjo është veçse një propagandë. “Është e pamundur, janë veçse një propagandë. Ne jemi një vend në NATO dhe i sigurtë. Ata duan të intimidojnë Policinë e Shtetit”.
Dje presidenti thirri Këshillin e Sigurimit Kombëtarë, për të diskutuar përmasat e cënimit të sistemeve elektronike publike. Kryeministri Rama, në mënyrë të përsëritur pas sulmeve ka kërkuar mbështetje financiare dhe asistencë nga ekspertë të NATO-s, SHBA-së e BE-së, për të sofistikuar mbrojtjen kibernetike.
