Rikthehen trazirat në futbollin argjentinas, por këtë herë në kampionatin elitar dhe jo në ligat e ulëta ku dhuna është e pranishme në çdo javë. Ajo që ka ndodhur në përballjen mes Colon dhe Velez Sarsfield e kthen me të vërtetë disa vite pas futbollin në Argjentinë.
Tre shashka të mëdha kanë shpërthyer gjatë ndeshjes së vlefshme për javën e 22-të të kampionatit. Gjyqtari i takimit Andrés Merlos kishte paralajmëruar qartazi skuadrat pas dy shpërthimeve të para, që ndodhën përkatësisht në minutën e 5-të dhe në minutën e 15-të: “Nëse ndodh sërish do të ndërpres ndeshjen”.
Dhe nuk zgjati shumë dhe një shpërthim tjetër ndodhi në fushë që solli dhe anulimin e ndeshjes.
Sipas asaj që raporton media argjentinase, Superliga vendase do të paraqesë një raport të gjyqtarit në Komisionin Disiplinor të AFA (Federata Argjentinase e Futbollit) për të përcaktuar më pas edhe sanksionet përkatëse për ngjarjen e rëndë.
Në fakt, duket se gjesti është një lloj proteste e tifozerisë vendase kundrejt klubit, që nuk pranoi kërkesat e mbështetësve për të mbuluar financiarisht kostot e transfertave të kampionatit. Gjithsesi, pritet që dënimet të jenë të ashpra për klubin, por edhe për tifozerinë vendase.