Tre ish-ministra të Drejtësisë do të thirren nga Prokuroria e Tiranës për të dëshmuar lidhur me rolin e tyre në procedurat e prokurimit sa i takon skandalit të zbuluar me tenderin e byzylykëve.
Konkretisht, ish-ministri Ylli Manjani, Petrit Vasili dhe Gazmend Bardhi do të dëshmojnë, ndërsa mësohet se ish-ministrat Manjani dhe Vasili nuk janë në hetim. Megjithatë, dëshmitë e tyre do të merren në proces verifikimi.
Duke qenë se kontratat vijojnë të jenë në zbatim edhe aktualisht, organi i akuzës do të kryejë një verifikim edhe për ministren aktuale të Drejtësisë, Etilda Gjonaj, raporton Panorama.
Ndaj zyrtarëve dhe ish-zyrtarëve të Ministrisë së Drejtësisë kishte nisur prej muajsh një hetim, i cili u finalizua ditën e martë me caktimin e masave të sigurisë për 12 ish-zyrtarët. Ndërsa disa prej tyre ishin thirrur pak kohë më parë për t’u marrë në pyetje.
Mësohet se njëri nga të arrestuarit, drejtori i Shërbimeve Ekonomike dhe Mbështetëse në këtë ministri, Aurel Lamçe, që njëkohësisht ishte i komanduar edhe si sekretar i përgjithshëm, është shoqëruar mbrëmjen e së martës nga oficerët e Antikrimit Ekonomik.
Ai ndodhej në një lokal në afërsi të Tregut Elektrik, kur u ndalua në zbatim të urdhrit të Prokurorisë.
Nën masë sigurimi “Arrest shtëpie” është dhe ish-sekretarja e përgjithshme e Ministrisë së Drejtësisë, Juliana Hoxha. Ndërkohë, në burg janë edhe dy ekspertë të IT, Lysien Ali dhe Arlind Alika.
