Mbretëresha Elisabeta përshihet në një skandal! Sipas zbulimit të disa dokumenteve financiare të quajtura “Paradise Papers”, miliona paund të Mbretëreshës Elisabeta investohen në fonde offshore në parajsat e taksave të Karaibeve.
Bëhet fjalë për më shumë se 13,4 milion dokumente të rezervuara, të cilat i ka në zotërim gazeta gjermane Suddeutsche Zeitung. Kjo e fundit i ka ndarë dokumentet me Organizatën Ndërkombëtare të Gazetarëve Investigues dhe partnerët e saj, duke përfshirë The Guardian, BBC, New York Times dhe Espresso.
Sipas dokumenteve, Mbretëresha ka investuar në parajsën fiskale të ishullit Kajman nëpërmjet Dukës Lancaster. Por, emri i saj nuk është i vetmi i personaliteteve me famë botërore, pasi në dokumentet e reja të zbuluara rezulton të jetë edhe Raina, Mbretëresha e Jordanisë si dhe këngëtarja Madona.
Po ashtu, në këtë listë përfshihet edhe emri i një ministri të Donald Trump, si dhe Sekretarit të Tregtisë së Trump, Uilbur Ross, i cili zotëron një pjesë në një firmë të lidhur me biznesmenët rusë që janë subjekt i sanksioneve të SHBA.
Në skandal përflitet edhe për përfshirjen e Lord Ashcroft, biznesmenit dhe ish-kreut të Parisë Konservatore britanike, që mësohet të ketë fshehur një pasuri 450 milionëshe në llogaritë offshore.
“Paradise Papers” mund të konsiderohet si rrjedhja e dytë më e madhe e të dhënave në histori, pas “Panama Papers” dhe publikohen në më pak se dy vjet pasi rrjedhja e këtyre të fundit shkaktoi tronditje duke zbuluar se si dhjetëra figura të njohura po fshihnin pasuri në fondet offshore.
